Este próximo sábado día 20, ás 21:00 h., no Auditorio Municipal de Vilagarcía de Arousa e en beneficio do "Club de Leones", o corpo de ballet da Escola de Danza "Perla de Arosa" participará no denominado ESPECTÁCULO ESCENOGRÁFICO GALEGO, que segundo explica José Álvarez, un dos seus responsables, non se trata dun festival ao uso, xa que existe un fío argumental que vai enlazando todas as actuacións que se sucederán na escena, os efectos da escenografía, vestiario e iluminación estarán tratados dun xeito que quere sorprender e marabillar aos espectadores. Vanse render varios homenaxes, primeiro á figura do peregrino, oportunamente porque nos encontramos nun Ano Santo. A nosa escola renderá tributo e unha sentida lembranza ao artista vilagarcián, Manolo Rey, por medio dunha das súas creacións, o famoso "virapé".
Teremos tamén a oportunidade de disfrutar coas actuacións de:
- A Farsa da Danza das Espadas de Carril, que será interpretada por primeira vez no Auditorio da capital arousá.
- Viri Cancelo e Alberto Dosil interpretarán o sainete galego: "A medosa Blandina". Ademais como figurantes en diversos momentos do espectáculo participarán as actrices do grupo de teatro O Noso Lar.
- No apartado de música tradicional poderemos disfrutar coa participación de Os Terribles de Arousa, o grupo de gaiteiros da Asociación Cultural "Nós" de Sobradelo e un grupo instrumental.
Máis de 120 persoas, entre artistas, técnicos e colaboradores participan neste acto benéfico.
O "Club de Leones" conta coa axuda do Concello de Vilagarcía e da Deputación Provincial de Pontevedra para poder levar a bo término este espectáculo benéfico.
